చల్లగా వున్నప్పుడు ఈ చిల్లీ పన్నీర్ తింటే భలే వుంటుంది..పేరు వినగానే అబ్బో కష్టం అనిపిస్తుంది కాని చేయటం సులువే...పైగా మన వీలు బట్టి చేసే విధానం లో మార్పులు , చేర్పులు చేసుకోవచ్చు. నేను చేసే విధానం ఎలాగో చెబుతాను ... కావలసిన పదార్ధాలు లిస్టు చూసి భయపడకండి. లిస్టు పెద్దదే కాని అవన్నీ రోజు మనం వాడేవే.
కావలసిన పదార్ధాలు :
పన్నీర్ -250 గ్రాములు
మైదా - రెండు చెంచాలు
కార్న్ ఫ్లోర్ - రెండు చెంచాలు
సెనగ పిండి - ఒక చెమ్చా
మిరియాల పొడి చిటికెడు
కారం - ఒక చెమ్చా
ఉప్పు - సరిపడినంత
పసుపు - చిటికెడు
చిల్లి సాస్ - అర చెమ్చ
సోయా సాస్ - అర చెమ్చా
టమాటో సాస్ - ఒక చెమ్చా
కాప్సికం - రెండు
ఉల్లిపాయ - ఒకటి
పచ్చి మిర్చి - రెండు
అజినమోటో - అర చెమ్చా
నీరు - సరిపడి నంత
నూనె - వేపుకు సరిపడ్డ
తయారి విధానం :
ముందుగా పన్నీర్ ని చిన్న ముక్కలుగా కట్ చేసి పెట్టుకోవాలి.
ఒక బౌల్ లో మైదా , కార్న్ ఫ్లోర్ , ఉప్పు , కారం, సెనగ పిండి, మిరియాల పొడి,పసుపు వేసి బాగా కలిపి ఆ తర్వాత కొంచం నీరు పోసి దోసల పిండి లా కలపాలి.
అందులో పన్నీర్ వేసి బాగా మిక్స్ చేసి పక్కన పెట్టాలి. ఓ పావుగంట తర్వాత పన్నీర్ ముక్కలని తీసి నూనెలో వేయించాలి.
ఆ తర్వాత చిన్న ముక్కలుగా కట్ చేసిన ఉల్లి, క్యాప్సికం, పచ్చ్హి మిర్చి లని ఒక మూకుడులో రెండు చెంచాల నూనె లో వేయించాలి. అవి ఎర్రగా వేగాగానే, సాసులన్నిటి ని వేసి బాగా కలపాలి .ఆ తర్వాత వేయించిన పన్నీర్ కూడా వేసి , అజినమోటో కూడా చేర్చి బాగా కలిపి స్టవ్ ఆపాలి. .ఇష్టమయితే కొత్తిమీర వేసుకోవచ్చు
ఈ చిల్లి పన్నీర్ చాలా రుచిగా వుంటుంది.
